ଆଜି ଛତିଶଗଡ଼ ଭୋଟ୍

() ଛତିଶଗଡ଼ରେ ଆଜି ୨୦ଟି ଆସନରେ ପ୍ରଥମ ପର୍ଯ୍ୟାୟରେ ନିର୍ବାଚନ। ସେଥିରେ ରହିଛି ନକ୍ସଲପ୍ରବଣ ବସ୍ତରର ୧୨ଟି ଆସନ । ସକାଳ ୮ଟାରୁ ଆରମ୍ଭ ହେବ ଭୋଟିଂ । ନିର୍ବାଚନ ଲାଗି ୬୦ ହଜାରରୁ ଅଧିକ ନିରାପତ୍ତା ରକ୍ଷୀଙ୍କୁ ମୁତୟନ କରାଯାଇଛି । ବିଭିନ୍ନ ସ୍ଥାନରେ ଯବାନଙ୍କ ସର୍ଚ୍ଚ ଅପରେସନ କରାଯାଇଛି । ପୋଲିଂ ପାର୍ଟି ଗନ୍ତବ୍ୟସ୍ଥଳରେ ପହଞ୍ଚିଛନ୍ତି । ବସ୍ତର ଅଞ୍ଚଳର ଅନ୍ତଗଡ଼ରେ କଂଗ୍ରେସର ରୂପ ସିଂ ପୋତାଇ ପ୍ରାର୍ଥୀ ହୋଇଥିବାବେଳେ ବିଜେପି ରାଜ୍ୟ ସଭାପତି ବିକ୍ରମ ଉସେନ୍ଦି ପ୍ରାର୍ଥୀ ହୋଇଛନ୍ତି । ବସ୍ତରରେ କଂଗ୍ରେସର ଲକ୍ଷେଶ୍ବର ବଘେଲଙ୍କୁ ପ୍ରତିଦ୍ବନ୍ଦ୍ବିତା କରୁଛନ୍ତି ବିଜେପିର ମଣିରାମ କଶ୍ୟପ । ଦାନ୍ତେଓ୍ବାଡାରେ କଂଗ୍ରେସର ଛବିନ୍ଦ୍ର କର୍ମାଙ୍କ ସହ ପ୍ରତିଦ୍ବନ୍ଦ୍ବିତା କରୁଛନ୍ତି ବିଜେପିର ଚୈତରାମ ଅତାମି ।

ପ୍ରଥମ ପର୍ଯ୍ୟାୟ ନିର୍ବାଚନରେ ୨୦ ଆସନରେ ଲଢୁଛନ୍ତି ୨୨୩ ପ୍ରାର୍ଥୀ । ସେମାନଙ୍କ ମଧ୍ୟରୁ ୧୯୮ ପୁରୁଷ ଓ ୨୫ଜଣ ମହିଳା ପ୍ରାର୍ଥୀ । ପ୍ରଥମ ପର୍ଯ୍ୟାୟରେ ଭୋଟ ଦେବେ ୪୦ ଲକ୍ଷ ୭୮ ହଜାରରୁ ଅଧିକ ଭୋଟର । ନିର୍ବାଚନ ଲାଗି ୫ ହଜାର ୩୦୪ଟି ବୁଥ୍ ବ୍ୟବସ୍ଥା କରାଯାଇଛି । ୨୦୧୮ ନିର୍ବାଚନରେ କଂଗ୍ରେସକୁ ୭୧ ଆସନ ମିଳିଥିବାବେଳେ ବିଜେପିକୁ ମିଳିଥିଲା ୧୫ ଆସନ । ୨୦୨୪ ଜାନୁଆରୀ ୩ରେ ଛତିଶଗଡ଼ ବିଧାନସଭାର କାର୍ଯ୍ୟକାଳ ଶେଷ ହେଉଛି । ଦ୍ବିତୀୟ ପର୍ଯ୍ୟାୟ ନିର୍ବାଚନ ଆସନ୍ତା ୧୭ରେ ହେବ । ଅବଶିଷ୍ଟ ୭୦ ଆସନରେ ହେବ ଭୋଟ । ମତଦାନ କରିବେ ୧ କୋଟି ୬୩ ଲକ୍ଷରୁ ଅଧିକ ଭୋଟର ।