ଓଡ଼ିଶାରେ ବିଶ୍ବର ପ୍ରଥମ କଳାବାଘ ସଫାରୀ

() ବନ୍ୟଜନ୍ତୁ ପର୍ଯ୍ୟଟନ କ୍ଷେତ୍ରରେ ନୂଆ ଅଧ୍ୟାୟ । ଓଡ଼ିଶାରେ ହେବ ବିଶ୍ବର ପ୍ରଥମ କଳାବାଘ ସଫାରୀ । ମୟୂରଭଞ୍ଜ ଜିଲ୍ଲାର ବାରିପଦାରେ କଳାବାଘ ସଫାରୀ ପ୍ରତିଷ୍ଠା ହେବ । ଏନେଇ ସୋସିଆଲ ମିଡିଆ ଏକ୍ସରେ ସୂଚନା ଦେଇଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । କଳାବାଘ ସଫାରୀ ପାଇଁ ଓଡ଼ିଶାର ପ୍ରସ୍ତାବକୁ ଏନଟିସିଏ ଅନୁମୋଦନ ଦେଇଛି । ୧୮ ନମ୍ବର ଜାତୀୟ ରାଜପଥ କଡ଼ରେ ୨ ଶହ ହେକ୍ଚର ପରିମିତ ଜଙ୍ଗଲରେ ଅକ୍ଟୋବରରୁ ଆରମ୍ଭ ହେବ ସଫାରୀ । ଶହେ ହେକ୍ଟରରେ ହେବ ପ୍ରଦର୍ଶନୀ ଅଞ୍ଚଳ । ଅନ୍ୟ ଶହେ ହେକ୍ଟର ଅଞ୍ଚଳରେ ପଶୁଚିକିତ୍ସା କେନ୍ଦ୍ର ସହ ଉଦ୍ଧାର କରାଯାଇଥିବା ପଶୁଙ୍କ ଥଇଥାନ କେନ୍ଦ୍ର ନିର୍ମାଣ କରାଯିବ । କର୍ମଚାରୀଙ୍କ ପାଇଁ ବାସଭବନ ସହ ପର୍ଯ୍ୟଟକଙ୍କ ପାଇଁ ସମସ୍ତ ସୁବିଧା ଉପଲବ୍ଧ ରହିବ । ଶିମିଳିପାଳ ବ୍ୟାଘ୍ର ସଂରକ୍ଷଣ ପ୍ରକଳ୍ପ ଠାରୁ ଏହା ୧୫ କିଲୋମିଟର ଦୂରରେ ହେବ । ନୂଆ ସଫାରୀର ଡିଜାଇନ ଓ ଲ୍ୟାଣ୍ଡସ୍କେପ ଶିମିଳିପାଳ ଭଳି କରାଯିବ । ମେଲାନିଷ୍ଟିକ କଳାବାଘ କେବଳ ସିମିଳିପାଳ ଅଞ୍ଚଳରେ ଦେଖାଯାଆନ୍ତି । ନନ୍ଦନକାନନରେ ଥିବା ବଳକା ବାଘ ସହ ଅନ୍ୟ ଅଞ୍ଚଳରୁ ଚାଲିଆସିଥିବା ବାଘ ମଧ୍ୟ ଏହି ସଫାରୀରେ ରହିବେ । ଶିମିଳିପାଳ ଅଭୟାରଣ୍ୟରେ ଏବେ ୧୦ଟି କଳାବାଘ ରହିଥିବା ଜଣାପଡ଼ିଛି । କଳାବାଘ ସଫାରୀ ହେବା ଫଳରେ ପର୍ଯ୍ୟଟକଙ୍କୁ ଏକ ନୂଆ ଅନୁଭୂତି ମିଳିବ ।