ଶରୀରରେ ମନ୍ଦିର ବନାଇଛନ୍ତି ଏହି ସମ୍ପ୍ରଦାୟର ଲୋକେ…

ଆଜିରାମ ମନ୍ଦିର ପ୍ରାଣ ପ୍ରତିଷ୍ଠା । ସାରା ଦେଶରେ ଉତ୍ସୁକତା । ଶ୍ରୀରାମଙ୍କ ପ୍ରତି ନିଜର ଭକ୍ତି ପ୍ରଦର୍ଶନ କରିବାକୁ ଲୋକେ ଭିନ୍ନ ଭିନ୍ନ ମାଧ୍ୟମ ଆପଣାଉଛନ୍ତି । ତେବେ ଆପଣ ଜାଣି ଆଶ୍ଚର୍ଯ୍ୟ ହେବେ ଏମିତି ଏକ ସମ୍ପ୍ରଦାୟ ଅଛନ୍ତି ଯେଉଁମାନେ ନିଜ ଶରୀରରେ ହିଁ ଶ୍ରୀରାମଙ୍କ ପବିତ୍ର ମନ୍ଦିରର ଟାଟୁ କରିଛନ୍ତି । ଏଭଳି ସମ୍ପଦାୟ ହେଉଛି ‘ରାମନାମୀ’ ସମ୍ପ୍ରଦାୟ, ଯାହା ମଧ୍ୟପ୍ରଦେଶ, ଛତିଶଗଡ ଓ ଝାରଖଣ୍ଡରେ ବସବାସ କରନ୍ତି ।

ଏହି ସମ୍ପଦାୟର ଲୋକେ ନିଜର ପୁରା ଶରୀରରେ ଶ୍ରୀରାମ ନାମକୁ ଚିତା ମାଧ୍ଯମରେ ଲେଖିଛନ୍ତି  ।ଏମାନେ କେବଳ ରାମଚରିତ ମାନସ ଓ ରାମାୟଣ ପୁରାଣକୁ ପୂଜା କରନ୍ତି । ଏହି ସମ୍ପଦାୟର ଲୋକେ ନା କେଉଁ ମନ୍ଦିରକୁ ଯାଆନ୍ତି ନା ଶ୍ରୀରାମଙ୍କ ପୂଜା କରନ୍ତି । କାରଣ ଏହି ସମ୍ପଦାୟର ମାନ୍ୟତା ଅନୁସାରେ, ଶ୍ରୀରାମ କୌଣସି ମନ୍ଦିର କିମ୍ବା ମୂର୍ତ୍ତିରେ ସୀମିତ ନାହାଁନ୍ତି । ସେ ପ୍ରତି ଜୀବନରେ ଅଛନ୍ତି ।

୧୮୯୦ ମସିହାରେ ଏହି ସମାଜ ଗଠନ ହୋଇଥିଲା । ଏହା ପଛରେ ରହିଛି ଏକ କାରଣ । ଦଳିତ ହୋଇଥିବାରୁ ସେ ସମୟରେ ଏମାନଙ୍କୁ ଶ୍ରୀରାମଙ୍କ ମନ୍ଦିରରେ ପ୍ରବେଶ କରିବାକୁ ଦିଆଯାଉନଥିଲା । ସବୁ ଧାର୍ମିକ କାର୍ଯ୍ୟ ପ୍ରତି କଟକଣା କରଯାଉଥିଲା । ତେଣୁ ସେତେବେଳର ଜଣେ ଦଳିତ ବ୍ୟକ୍ତି ପର୍ଶୁରାମ ଏହି ସମାଜର ଗଠନ ପାଇଁ ଆଗକୁ ବଢିଥିଲେ ।

ତାଙ୍କ କହିବା ଅନୁସାରେ ଈଶ୍ୱର ସବୁ ସ୍ଥାନରେ ସମସ୍ତଙ୍କ ଶରୀରରେ ଅଛନ୍ତି । ଶ୍ରୀରାମ ମନୁଷ୍ୟର ପ୍ରତି ଧମନୀରେ ରହିଛନ୍ତି । ତାଙ୍କୁ ଅନୁଭବ କରିବାକୁ ପଡିବ । ସକାଳୁ ଉଠିଲେ ରାମ ନାମ ଓ ମଣିଷର ଶେଷ ସମୟରେ ମଧ୍ୟ ରାମ ନାମ କୁହାଯାଏ । ତେଣୁ ଏହି ସମାଜ ସେବେଠୁ ନିଜ ମନପ୍ରାଣ, ଶରୀରକୁ ଶ୍ରୀରାମଙ୍କୁ ସମର୍ପିତ କରି ବଞ୍ଚିଆସୁଛନ୍ତି ।