ଡେରାଡୁନ୍ରେ ବାଦଲଫଟା ବର୍ଷା; ୨ ମୃତ
ଦେବଭୂମି ଉତ୍ତରାଖଣ୍ଡରେ ପୁଣି କୋପ କରିଛି ପ୍ରକୃତି । ଡେରାଡୁନରେ ବାଦଲଫଟା ବର୍ଷା ହୋଇଛି । ପ୍ରବଳ ବର୍ଷା ଯୋଗୁଁ ତମସା ନଦୀରେ ବନ୍ୟା ଆସିଛି । ତପ୍କେଶ୍ୱର ମହାଦେବ ମନ୍ଦିରରେ ପାଣି ପଶିଛି । ଦୋକାନ ଭାସି ଯାଇଛି । ସହସ୍ତ୍ରଧାରାରେ ମଧ୍ୟରାତ୍ରିରେ ବାଦଳଫଟା ବର୍ଷା ପ୍ରବଳ କ୍ଷୟକ୍ଷତି ଘଟାଇଛି । ରାସ୍ତାଘାଟ ନଷ୍ଟ ହୋଇଯାଇଛି। ବିଭିନ୍ନ ସ୍ଥାନକୁ ଯାତାୟତ ଠପ୍ ହୋଇଯାଇଛି । ରିପୋର୍ଟ ଲେଖାଯିବା ସୁଦ୍ଧା ୨ ଜଣଙ୍କର ମୃତ୍ୟୁ ହୋଇଛି । ଅନେକ ନିଖୋଜ ଥିବା ଆଶଙ୍କା କରାଯାଉଛି । ସ୍ଥାନୀୟ ଲୋକ ଓ ଜିଲ୍ଲା ପ୍ରଶାସନ ପକ୍ଷରୁ ଉଦ୍ଧାରକାର୍ଯ୍ୟ ଜାରି ରହିଛି । ଦୋଇୱାଲାରେ ପ୍ରବଳ ବର୍ଷା ଯୋଗୁଁ ଲାଲ ତପ୍ପଦରେ ଡେରାଡୁନ-ହରିଦ୍ୱାର ରାଜପଥର ପୋଲ ଜାଖନ ନଦୀ ବନ୍ୟା ପାଣିରେ ବୁଡ଼ି ଯାଇଛି । ଭାରତୀୟ ପାଣିପାଗ ବିଭାଗ ଡେରାଡୁନ ଏବଂ ତେହରି ଗଡ଼ୱାଲ ପାଇଁ ରେଡ୍ ଆଲର୍ଟ ଜାରି କରିଛି । ଏନ୍ଡିଆରଏଫ ଓ ଏସ୍ଡିଆରଏଫ୍ ପକ୍ଷରୁ ଉଦ୍ଧାରକାର୍ଯ୍ୟ ଜାରି ରହିଛି ।
ପ୍ରବଳ ବର୍ଷା ଯୋଗୁ ଋଷିକେଶରେ ଥିବା ଚନ୍ଦ୍ରଭାଗା ନଦୀରେ ବି ବନ୍ୟା ଆସିଛି । ରାସ୍ତା ଉପରେ ଲହଡ଼ି ମାରୁଛି ବନ୍ୟା ପାଣି । ନଦୀରେ ଫସିଥିବା ତିନିଜଣଙ୍କୁ ଏସଡିଆରଏଫ ଟିମ୍ ଉଦ୍ଧାର କରିଛନ୍ତି । ଏଥିସହ ଗାଡ଼ିମଟର ମଧ୍ୟ ଫସି ରହିଥିବା ଦେଖିବାକୁ ମିଳିଛି । ଜଣେ ସ୍ଥାନୀୟ ଲୋକ କହିଛନ୍ତି, ସୋମବାର ସନ୍ଧ୍ୟାରୁ ବର୍ଷା ଲାଗି ରହିଛି । ବିଳମ୍ବିତ ରାତିରେ ଦୁଇଟି ସ୍ଥାନରେ ବାଦଲଫାଟି ବ୍ୟାପକ କ୍ଷତି ଘଟାଇଛି । ରାସ୍ତା କ୍ଷତିଗ୍ରସ୍ତ ହୋଇଛି । ଗାଁ ଗୁଡିକ ମଧ୍ୟ କ୍ଷତି ହୋଇଛି । ୪ରୁ୫ ଜଣ ଚାପି ହୋଇ ରହିଛନ୍ତି ।
ଘଟଣାକୁ ନେଇ ଦୁଃଖ ପ୍ରକାଶ କଲେ ମୁଖ୍ୟମନ୍ତ୍ରୀ- ବାଦଲ ଫଟା ବର୍ଷାରେ କ୍ଷୟକ୍ଷତିକୁ ନେଇ ଦୁଃଖ ପ୍ରକାଶ କରିଛନ୍ତି ଉତ୍ତରାଖଣ୍ଡ ମୁଖ୍ୟମନ୍ତ୍ରୀ ପୁଷ୍କର ସିଂହ ଧାମି । ସୋସିଆଲ ମିଡିଆ ଏକ୍ସରେ ଲେଖିଛନ୍ତି, ”ସହସ୍ତ୍ରଧାରାରେ ବିଳମ୍ବିତ ରାତିରେ ବାଦଲଫଟା ବର୍ଷାରେ କିଛି ଦୋକାନ କ୍ଷତି ହୋଇଛି । ଜିଲ୍ଲା ପ୍ରଶାସନ, ଏସଡିଆରଏଫ, ପୁଲିସ ଘଟଣାସ୍ଥଳରେ ପହଞ୍ଚି ଉଦ୍ଧାରକାର୍ଯ୍ୟରେ ଲାଗିଛନ୍ତି । ଏ ନେଇ ମୁଁ ନିରନ୍ତର ସ୍ଥାନୀୟ ପ୍ରଶାସନ ସମ୍ପର୍କରେ ରହିଛି ।”
ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ କେନ୍ଦ୍ର ଗୃହମନ୍ତ୍ରୀ ଅମିତ ଶାହ ଉତ୍ତରାଖଣ୍ଡର ମୁଖ୍ୟମନ୍ତ୍ରୀ ପୁଷ୍କର ସିଂହ ଧାମିଙ୍କ ସହ ଫୋନ୍ ଯୋଗେ କଥା ହୋଇଛନ୍ତି । ଉତ୍ତରାଖଣ୍ଡରେ ପ୍ରବଳ ବର୍ଷା ଯୋଗୁଁ ସୃଷ୍ଟି ହୋଇଥିବା ପରିସ୍ଥିତି ବିଷୟରେ ବିସ୍ତୃତ ଆଲୋଚନା କରିଛନ୍ତି । ସେମାନେ ସମସ୍ତ ପ୍ରକାରର ସହାୟତାର ପ୍ରତିଶ୍ରୁତି ଦେଇଛନ୍ତି, ଏହି ସଙ୍କଟର ମୁହୂର୍ତ୍ତରେ କେନ୍ଦ୍ର ସରକାର ଉତ୍ତରାଖଣ୍ଡ ସହିତ ଛିଡ଼ା ହୋଇଛନ୍ତି ବୋଲି କହିଛନ୍ତି।