ଭାରତ କୌଣସି ଧର୍ମଶାଳା ନୁହେଁ ବୋଲି କହିଲେ ସୁପ୍ରିମକୋର୍ଟ

ସୁପ୍ରିମକୋର୍ଟ ଆଜି ଜଣେ ଶ୍ରୀଲଙ୍କା ନାଗରିକଙ୍କ ଆବେଦନକୁ ଖାରଜ କରି କହିଛନ୍ତି ଯେ ଭାରତ କୌଣସି ଧର୍ମଶାଳା ନୁହେଁ ଯେଉଁଠାରେ ଆମେ ବିଶ୍ୱର ବିଭିନ୍ନ ସ୍ଥାନରୁ ବିଦେଶୀ ନାଗରିକଙ୍କୁ ସ୍ଥାନ ଦେଇପାରିବୁ । ସୁପ୍ରିମକୋର୍ଟ କହିଥିଲେ ଯେ ସାରା ବିଶ୍ୱରୁ ଆସୁଥିବା ଶରଣାର୍ଥୀଙ୍କୁ ଭାରତରେ ଆଶ୍ରୟ ଦିଆଯାଇପାରିବ କି ? ଭାରତରେ ପୂର୍ବରୁ ୧୪୦ କୋଟି ଲୋକ ରହୁଛନ୍ତି । ଶ୍ରୀଲଙ୍କାରୁ ଭାରତ ଆସିଥିବା ଜଣେ ପୂର୍ବତନ LTTE (ଲିବରେସନ ଟାଇଗର୍ସ ଅଫ୍ ତାମିଲ ଏଲମ୍) ସଦସ୍ୟଙ୍କ ଆବେଦନକୁ ଖାରଜ କରି କୋର୍ଟ ଏହା କହିଛନ୍ତି। ଆବେଦନକାରୀ ଭାରତରେ ରହିବାକୁ ଅନୁମତି ଦେବାକୁ ପ୍ରାର୍ଥନା କରିଥିଲେ ।

ସୂଚନା ଅନୁସାରେ ଶ୍ରୀଲଙ୍କାର ଜଣେ ନାଗରିକଙ୍କୁ ୨୦୧୫ ମସିହାରେ ତାମିଲନାଡୁରେ ଗିରଫ କରାଯାଇଥିଲା । ପୋଲିସ ତାଙ୍କୁ ସନ୍ଦେହ କରି ଗିରଫ କରିଥିଲା । ତେବେ ତଦନ୍ତରେ ପ୍ରମାଣିତ ହୋଇଥିଲା ଯେ ସେ ଶ୍ରୀଲଙ୍କାର ଜଣେ ତାମିଲ ଆତଙ୍କବାଦୀ ଥିଲେ ଯିଏ ବେଆଇନ ଭାବରେ ଭାରତରେ ପ୍ରବେଶ କରିଥିଲେ । ନିମ୍ନ ଅଦାଲତ ତାଙ୍କୁ UAPA ଆଇନ ଅନୁଯାୟୀ ୧୦ ବର୍ଷ ଜେଲଦଣ୍ଡରେ ଦଣ୍ଡିତ କରିଥିଲେ। କିନ୍ତୁ ୨୦୨୨ ମସିହାରେ, ହାଇକୋର୍ଟ ଏହି ଦଣ୍ଡାଦେଶକୁ ୭ ବର୍ଷକୁ ହ୍ରାସ କରିଥିଲେ । କିନ୍ତୁ ହାଇକୋର୍ଟ କହିଥିଲେ ଯେ ଦଣ୍ଡାଦେଶ ସମାପ୍ତ ହେବା ପରେ ସେହି ବ୍ୟକ୍ତିଙ୍କୁ ଭାରତ ଛାଡି ଶ୍ରୀଲଙ୍କା ଯିବାକୁ ପଡିବ ।