ପାକିସ୍ତାନକୁ ପୁଣି ପରାସ୍ତ କଲା ଭାରତ; ୬ ଓ୍ବିକେଟ୍ରେ ଜିତିଲା ଟିମ୍ ଇଣ୍ଡିଆ
ପାକିସ୍ତାନକୁ ପୁଣି ଧୋଇଲା ଭାରତ । ଏସିଆ କପ୍ ୨୦୨୫ର ସୁପର ଫୋର ମୁକାବିଲାରେ ପାକିସ୍ତାନର ଶୋଚନୀୟ ପରାଜୟ । ଭାରତୀୟ ଟିମ୍ ପାକିସ୍ତାନକୁ ପରାସ୍ତ କରିଛି । ଓପନର ଅଭିଷେକ ଶର୍ମାଙ୍କ ବିସ୍ଫୋରକ ବ୍ୟାଟିଂ ବଳରେ ସୂର୍ଯ୍ୟ ସେନା ପାରମ୍ପରିକ ପ୍ରତିଦ୍ଵନ୍ଦ୍ଵୀ ପାକିସ୍ତାନକୁ ୬ ଓ୍ଵିକେଟରେ ପରାସ୍ତ କରିଛି । ଦମଦାର ବିଜୟ ସହ ଫାଇନାଲ୍ ଆଡ଼କୁ ପାଦେ ଆଗେଇଛି ଭାରତ। ପ୍ରଥମେ ବ୍ୟାଟିଂ କରିଥିବା ପାକିସ୍ତାନ ଶାହିନଜାଦ ଫରହାନଙ୍କ ୫୮ ରନ ବଳରେ ୫ ଓ୍ଵିକେଟ୍ ହରାଇ ୧୭୧ ରନ କରିଥିଲା । ଜବାବରେ ଭାରତ ଅଭିଷେକ ଶର୍ମାଙ୍କ ବିସ୍ଫୋରକ ୭୪ ରନ ଓ ଗିଲଙ୍କ ୪୭ ରନ ବଳରେ ମ୍ୟାଚ୍କୁ ୧୮.୫ ଓଭରରେ ୪ ଓ୍ଵିକେଟ୍ ହରାଇ ଜିତି ନେଇଛି ।
ତିଳକ ବର୍ମା ଚୌକା ମାରି ମ୍ୟାଚ୍ ଶେଷ କରିଛନ୍ତି । ଏହା ସହ ସେ ୩୦ ରନର ମହତ୍ଵପୂର୍ଣ୍ଣ ଇନିଂସ ଖେଳିଛନ୍ତି । ଚଳିତ ଏସିଆ କପରେ ଭାରତଠୁ ପାକିସ୍ତାନର ଏହା ଦ୍ଵିତୀୟ ପରାଜୟ। ୧୭୨ ରନର ବିଜୟ ଲକ୍ଷ୍ୟ ପିଛା କରିଥିବା ଭାରତର ଦୁଇ ଓପନର ଅଭିଷେକ ଶର୍ମା ଓ ଶୁଭମନ ଗିଲ୍ ଆରମ୍ଭରୁ ଦମଦାର ବ୍ୟାଟିଂ କରିଥିଲେ। ପାକ୍ ବୋଲରଙ୍କୁ କୌଣସି ସୁଯୋଗ ନଦେଇ ରନ୍ ବର୍ଷା କରିଥିଲେ ଅଭିଷେକ ଓ ଶୁଭମନ। ଓପନିଂରେ ଶତକୀୟ ଭାଗିଦାରୀ ଯୋଡ଼ି ଭାରତର ବିଜୟ ସହଜ କରିଥିଲେ।
ପରେ ଭାରତ ଶୀଘ୍ର ଦୁଇଟି ଓ୍ଵିକେଟ୍ ହରାଇବାରୁ ଭାରତର ରନ ଗତି ଧିମେଇ ଯାଇଥିଲା। ଗିଲ୍ ୨୮ ବଲରୁ ୮ ଚୌକା ସହ ୪୭ ରନ କରିଥିଲେ। ବଡ଼ ସଟ୍ ଖେଳିବାକୁ ଉଦ୍ୟମ କରି ଅଧିନାୟକ ସୂର୍ଯ୍ୟକୁମାର ଯାଦବ(୦)ରେ ଆଉଟ୍ ହୋଇଥିଲେ। ଅନ୍ୟପଟେ ଅଭିଷେକ ଶର୍ମା ବ୍ୟାଟିଂ ଜାରି ରଖିଥିଲେ। ଅଭିଷେକ ଶର୍ମା ୩୯ ବଲ୍ରୁ ୬ ଚୌକା ଓ ୫ ଛକା ସହ ୭୪ ରନର ମ୍ୟାଚ୍ ବିଜୟୀ ଇନିଂସ ଖେଳି ଆଉଟ୍ ହୋଇଥିଲେ। ଏହା ପରେ ଭାରତର ରନ ଗତି ଧିମେଇ ଯାଇଥିଲା। ସଞ୍ଜୁ ସାମସନ ୧୭ ବଲରୁ ମାତ୍ର ୧୩ ରନ କରିଥିଲେ । ଶେଷ ଆଡ଼କୁ ମ୍ୟାଚ୍ ରୋମାଞ୍ଚକର ହୋଇଥିଲା। ତିଳକ ବର୍ମା ଲଗାତାର ଛକା ଓ ଚୌକା ମାରି ଭାରତକୁ ୧୮.୫ ଓଭରରେ ଜିତାଇଥିଲେ । ସେପଟେ ହାର୍ଦ୍ଦିକ ପାଣ୍ଡ୍ୟା ୭ ବଲ୍ରେ ୭ ରନ୍ କରି ଅପରାଜିତ ଥିଲେ ।