ରାଷ୍ଟ୍ରପତି ଭବନରେ ବିବାହ କରିବେ ଏହି ମହିଳା ଅଫିସର
ରାଷ୍ଟ୍ରପତି ଭବନରେ ଅନୁଷ୍ଠିତ ହେବାକୁ ଯାଉଛି ବିବାହ। ଶିବପୁରୀର ବାସିନ୍ଦା ପୁନମ ଗୁପ୍ତା ପ୍ରଥମ ଭାରତୀୟ ନାଗରିକ ଭାବେ ରାଷ୍ଟ୍ରପତି ଭବନରେ ବିବାହ କରିବାକୁ ଯାଉଛନ୍ତି। ମଧ୍ୟପ୍ରଦେଶ ଶିବପୁରୀର ବାସିନ୍ଦା ପୁନମ ସେଣ୍ଟ୍ରାଲ ରିଜର୍ଭ ପୋଲିସ ଫୋର୍ସର ମହିଳା ଆସିଷ୍ଟାଣ୍ଟ କମାଣ୍ଡାଣ୍ଟ ତଥା ରାଷ୍ଟ୍ରପତି ଭବନରେ ପିଏସଓ ଭାବରେ ସେ କାର୍ଯ୍ୟରତ ଅଛନ୍ତି । ଜମ୍ମୁ ଓ କାଶ୍ମୀରରେ ନିଯୁକ୍ତ ଥିବା ସିଆରପିଏଫ ଆସିଷ୍ଟାଣ୍ଟ କମାଣ୍ଡାଣ୍ଟ ଅବନୀଶ କୁମାରଙ୍କୁ ବିବାହ କରିବେ ପୁନମ୍ । ରାଷ୍ଟ୍ରପତି ଭବନର ମଦର ଟେରେସା କ୍ରାଉନ କମ୍ପ୍ଲେକ୍ସରେ ଏହି ବିବାହ ଅନୁଷ୍ଠିତ ହେବ।
ପ୍ରଥମ ଥର ପାଇଁ ରାଷ୍ଟ୍ରପତି ଭବନରେ ହେବ ବିବାହର ଆୟୋଜନ । ରାଷ୍ଟ୍ରପତିଙ୍କ ପିଏସଓ ଭାବେ କାର୍ଯ୍ୟରତ ସିଆରପିଏଫର ଆସିଷ୍ଟାଣ୍ଡ କମାଣ୍ଡାଣ୍ଟ ପୁନମ ଗୁପ୍ତାଙ୍କ ବିବାହ ପାଇଁ ରାଷ୍ଟ୍ରପତି ଭବନରେ ଜୋରଦାର ଆୟୋଜନ ଚାଲିଛି । ମଧ୍ୟପ୍ରଦେଶର ଶିବପୁରୀର ବାସିନ୍ଦା ପୁନମ ଗୁପ୍ତା, ଜମ୍ମୁ ଓ କାଶ୍ମୀରରେ ନିଯୁକ୍ତ ଥିବା ସିଆରପିଏଫ ଆସିଷ୍ଟାଣ୍ଟ କମାଣ୍ଡାଣ୍ଟ ଅବନୀଶ କୁମାରଙ୍କୁ ବିବାହ କରିବେ।
ଫେବୃଆରୀ ୧୨ରେ ରାଷ୍ଟ୍ରପତି ଭବନର ମଦର ଟେରେସା କ୍ରାଉନ କଂପ୍ଲେକ୍ସରେ ବିବାହ ଅନୁଷ୍ଠିତ ହେବାକୁ ଥିବା ବେଳେ ଧୁମଧାମରେ ଆୟୋଜନ ଚାଲିଛି । ଏନେଇ ପୁନମଙ୍କ ବାପାମାଆ ଦିଲ୍ଲୀରେ ପହଞ୍ଚି ସାରିଛନ୍ତି। ବିବାହରେ କେବଳ ପୁନମଙ୍କ ନିକଟ ସମ୍ପର୍କୀୟମାନେ ହିଁ ଯୋଗ ଦେବେ ବୋଲି ଜଣାପଡିଛି। ତେବେ ଏହି ବିବାହରେ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ସହିତ ଅନେକ ବଡ଼ ବଡ଼ ରାଜନୈତିକ ବ୍ୟକ୍ତିବିଶେଷ ମଧ୍ୟ ପୁନମଙ୍କୁ ଆଶୀର୍ବାଦ ଦେବା ପାଇଁ ଆସିବେ ବୋଲି ଜଣାପଡିଛି ।ପିଏସଓ ଭାବରେ ନିଯୁକ୍ତ ପୁନମଙ୍କ ଆଚରଣ ଓ ବ୍ୟବହାରରେ ଖୁବ ପ୍ରଭାବିତ ଥିଲେ ରାଷ୍ଟ୍ରପତି ଦ୍ରୌପଦୀ ମୁର୍ମୁ । ପୁନମଙ୍କ ବିବାହ ସମ୍ପର୍କରେ ଜାଣିବା ପରେ ରାଷ୍ଟ୍ରପତି ଭବନରେ ଆୟୋଜନ କରିବାକୁ ସେ ନିଜ ଆଡୁ ପ୍ରସ୍ତାବ ଦେଇଥିଲେ । ରାଷ୍ଟ୍ରପତିଙ୍କ ପ୍ରସ୍ତାବ ପରେ ପୁନମଙ୍କ ପରିବାର ବେଶ୍ ଉତ୍ସାହିତ ଅଛନ୍ତି ।ପୁନମଙ୍କ ବାପା ଶିବପୁରୀ ନବୋଦୟ ବିଦ୍ୟାଳୟରେ କାର୍ଯ୍ୟ କରୁଛନ୍ତି । ପୁନମ ଗଣିତ ସମ୍ମାନରେ ସ୍ନାତକ ଡିଗ୍ରୀ ହାସଲ କରିବା ପରେ ଇଂରାଜୀରେ ସ୍ନାତକୋତ୍ତର ଏବଂ ବିଇଡି ମଧ୍ୟ କରିଥିଲେ । ତେବେ ପୁନମ UPSC CAPF ପରୀକ୍ଷା-୨୦୧୮ରେ ୮୧ତମ ରାଙ୍କ୍ ହାସଲ କରିଥିଲେ ଏବଂ ପରେ ସିଆରପିଏଫରେ ଆସିଷ୍ଟାଣ୍ଟ କମାଣ୍ଡାଣ୍ଟ ହୋଇଥିଲେ । ୨୦୨୪ ମସିହାରେ ଗଣତନ୍ତ୍ର ଦିବସରେ ହୋଇଥିବା ପରେଡରେ ପୁନମ ସିଆରପିଏଫର ମହିଳା ଦଳର ନେତୃତ୍ୱ ନେଇଥିଲେ । ରାଷ୍ଟ୍ରପତିଙ୍କ ବ୍ୟକ୍ତିଗତ ସୁରକ୍ଷାର ଦାୟିତ୍ବରେ ରହିବା ପୂର୍ବରୁ ପୁନମ ନକ୍ସଲ ଅଧ୍ୟୁଷିତ ବିହାରରେ କାମ କରିଥିଲେ।