ଓଡ଼ିଶା ଏଆଇ ମିଶନ ୨୦୨୫-୨୬ ପାଇଁ ବଜେଟ୍ ଘୋଷଣା
ଭୁବନେଶ୍ୱର ସ୍ଥିତ ଲୋକସେବା କନଭେନ୍ସନ ହଲ୍ରେ ରିଜୋନାଲ ଏଆଇ ଇମ୍ପାକ୍ଟ କନଫରେନ୍ସ ଅନୁଷ୍ଠିତ ହୋଇଯାଇଛି । ଆଜି ଓ ଆସନ୍ତାକାଲି ଦୁଇ ଦିନ ଧରି ଏହି କାର୍ଯ୍ୟକ୍ରମ ଅନୁଷ୍ଠିତ ହେବ । ଇଲେକ୍ଟ୍ରୋନିକ୍ସ ଏବଂ ସୂଚନା ପ୍ରଯୁକ୍ତିବିଦ୍ୟା ମନ୍ତ୍ରଣାଳୟ (MeitY) ଘୋଷଣା କରିଛି ଯେ, ଶାସନ ଏବଂ ସାର୍ବଜନୀନ ସେବାରେ କୃତ୍ରିମ ବୁଦ୍ଧିମତ୍ତାର ଅତ୍ୟାଧୁନିକ ନିୟୋଜନକୁ ପ୍ରଦର୍ଶନ କରିବା ପାଇଁ ଓଡ଼ିଶା ସରକାରଙ୍କ ସହଯୋଗରେ ଭୁବନେଶ୍ୱରରେ ରିଜୋନାଲ ଏଆଇ ଇମ୍ପାକ୍ଟ କନଫରେନ୍ସ ଅନୁଷ୍ଠିତ ହୋଇଛି । ୧୮ରୁ ୨୦ ଡିସେମ୍ବର ୩ ଦିନ ଧରି ଆୟୋଜିତ ହୋଇଛି ।
ଏହି କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବରେ ମୁଖ୍ୟମନ୍ତ୍ରୀ ମୋହନ ମାଝୀ ଭର୍ଚୁଆଲି ଯୋଗ ଦେଇଥିଲେ । ମାନ୍ୟବର ମୁଖ୍ୟମନ୍ତ୍ରୀ ଏହି ସମ୍ମିଳନୀ ନେଇ ଏକ୍ସରେ ଟ୍ୱିଟ୍ କରିଛନ୍ତି ଯେ, କୃତ୍ରିମ ବୁଦ୍ଧିମତା (ଏଆଇ) ଏବେ ଶାସନ ବ୍ୟବସ୍ଥାର ସୁଧାର ଓ ସ୍ଥାୟୀ ବିକାଶରେ ଏକ ପ୍ରମୁଖ ବାହକ ଭାବରେ ଉଭା ହୋଇଛି । ଓଡ଼ିଶା ସରକାର ଏଆଇକୁ ବ୍ୟବହାର କରି ଜନତାଙ୍କୁ ଯଥାଶୀଘ୍ର ସେବା ପ୍ରଦାନ କରିବେ । ଏଥିସହ ବିଭିନ୍ନ କ୍ଷେତ୍ରରେ କାମକୁ ସହଜ ଓ ସରଳ କରିବା ସହ ନାଗରିକମାନଙ୍କୁ ସଶକ୍ତ କରିବା ପାଇଁ ଦୃଢ଼ ଭାବେ ପ୍ରତିବଦ୍ଧ । ଏଆଇ ଇମ୍ପାକ୍ଟ କନଫରେନ୍ସ ଓଡ଼ିଶାର ଇକୋସିଷ୍ଟମ ଏବଂ ରାଜ୍ୟର ସ୍ଥିତିକୁ ସୁଦୃଢ଼ କରିବ । ଏହା ପ୍ରଯୁକ୍ତିବିଦ୍ୟାକୁ ଆହୁରି ମଜବୁତ କରିବା ସହ ଭବିଷ୍ୟତରେ ଓଡ଼ିଶାକୁ ଏକ ଅଗ୍ରଣୀ ରାଜ୍ୟ ଭାବେ ଗଢ଼ି ତୋଳିବ ।
ଅନ୍ୟପଟେ ଆଇଟି ମନ୍ତ୍ରୀ ମୁକେଶ ମହାଲିଙ୍ଗ ଏବଂ ବିଭିନ୍ନ ଶିକ୍ଷାନୁଷ୍ଠାନର ଅଧ୍ୟାପକ ଓ ଛାତ୍ରଛାତ୍ରୀ ଏହି ସମିଟ୍ରେ ଯୋଗ ଦେଇଛନ୍ତି । ଏହି କାର୍ଯ୍ୟକ୍ରମରେ ଡିଜିଟାଲ ଇଣ୍ଡିଆ କ୍ଷେତ୍ରରେ ଏଆଇର ଭୂମିକା, ଗୁରୁତ୍ୱ ବିଷୟରେ ଆଲୋଚନା କରାଯାଇଥିଲା । ଛାତ୍ରଛାତ୍ରୀ ମାନେ ଏଆଇ ବ୍ୟବହାରକୁ କିଭଳି ସଫଳ ରୂପାୟନ କରିପାରିବେ । ଦୈନନ୍ଦିନ ଜୀବନରେ ଏଆଇର ଭୂମିକା ଏବଂ ଆବଶ୍ୟକତା ସମ୍ପର୍କରେ ଆଲୋଚନା କରାଯାଇଛି । ଡିଜିଟାଲ ଇଣ୍ଡିଆ କ୍ଷେତ୍ରରେ ପ୍ରଧାନମନ୍ତ୍ରୀଙ୍କ ନିରନ୍ତର ପ୍ରୟାସ ଏବଂ ମୁଖ୍ୟମନ୍ତ୍ରୀଙ୍କ ନେତୃତ୍ୱରେ ଓଡ଼ିଶା ଆଗକୁ ବଢ଼ୁଥିବା ମନ୍ତ୍ରୀ ମୁକେଶ ମହାଲିଙ୍ଗ କହିଛନ୍ତି । ଏହି ସମ୍ମିଳନୀରେ ଜାତୀୟ ଓ ଅନ୍ତର୍ଜାତୀୟ ସ୍ତରରେ କାମ କରୁଥିବା ଅନେକ ପ୍ରତିନିଧି ଓ ବିଭିନ୍ନ ଶିକ୍ଷାନୁଷ୍ଠାନର ଛାତ୍ରଛାତ୍ରୀ ମାନେ ସାମଲ ହୋଇଥିଲେ । ଏହି ଏଆଇ ସମ୍ମିଳନୀରେ ତିନି ସୁତ୍ର ପିପୁଲ, ପ୍ଲାନେଟ୍, ପ୍ରୋଗ୍ରେସ୍ ଓ ୭ ଚକ୍ରକୁ ନେଇ ଆଲୋଚନା ହୋଇଥିଲା ।
ଆଜି ଓଡ଼ିଶା ଏଆଇ ମିଶନ ପୋର୍ଟାଲ ଲଞ୍ଚ ହୋଇଛି । ଶାସନ ଏବଂ ନାଗରିକ ସେବା ପାଇଁ ଏଆଇ ଆପ୍ର ମୂଳ ଉଦ୍ଦେଶ୍ୟ ଏଆଇ ସହ ସାଧାରଣ ଲୋକ କାମ କରିପାରିବେ, ଏଆଇକୁ ସରକାରୀ ବ୍ୟବସ୍ଥାରେ ଉପଯୋଗ କରାଯାଇପାରିବ । ଶିକ୍ଷା, ସ୍ୱାସ୍ଥ୍ୟ, ବିପର୍ଯ୍ୟୟ ପରିଚାଳନା ବିଭାଗ, ମହିଳା ଓ ଶିଶୁ ବିକାଶ ବିଭାଗ ଓ ସଂସଦୀୟ ବ୍ୟାପାର ବିଭାଗରେ ଏଆଇ ଉପଯୋଗ ଉପରେ ଫୋକସ୍ କରାଯାଉଛି । ସୁଭଦ୍ରା ପୋର୍ଟାଲ ହେଉ ବା କୃଷି ସବ୍ସିଡିରେ ଏଆଇର ବ୍ୟବହାର କରାଯାଉଛି । ଆଗକୁ ୪୧ଟି ବିଭାଗରେ ଏଆଇ ଉପଯୋଗ ହେବ । ଲୋକାଭିମୁଖୀ ଯୋଜନାର ସଫଳ ରୂପାୟନ ପାଇଁ ଏଆଇ ବ୍ୟବହାର କରାଯିବ । ଓଡ଼ିଆ ଭାଷାକୁ ଏଆଇରେ ଆଣିବାକୁ ବ୍ୟବସ୍ଥା କରାଯିବ । ଭାଷାଦାନ କାର୍ଯ୍ୟକ୍ରମ କରାଯିବା ନେଇ ମନ୍ତ୍ରୀ ସୂଚନା ଦେଇଛନ୍ତି । ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି ଓଡ଼ିଶା ଏଆଇ ମିଶନ ୨୦୨୫-୨୬ ପାଇଁ ମୁଖ୍ୟମନ୍ତ୍ରୀ ବଜେଟ୍ ଘୋଷଣା କରିଛନ୍ତି ।