ଖୁବ୍ ଶୀଘ୍ର ପୃଥିବୀକୁ ଫେରିବେ ସୁନିତା ୱିଲିୟମ୍ସ

ଭାରତୀୟ ବଂଶୋଦ୍ଭବ ଆମେରିକୀୟ ମହାକାଶଚାରୀ ସୁନିତା ୱିଲିୟମ୍ସ ଖୁବ୍ ଶୀଘ୍ର ପୃଥିବୀ ପୃଷ୍ଠକୁ ଫେରିବେ । ଆମେରିକୀୟ ସ୍ପେସ୍ ଏଜେନ୍ସି ‘ନାସା’ ଏହି ସୂଚନା ଦେଇଛି । ସୁନିତା ୱିଲିୟମ୍ସ ଓ ବୁଚ୍ ୱିଲମୋର ଗତବର୍ଷ ଜୁନରୁ ବୋଇଂ ଷ୍ଟାରଲାଇନରରେ ଯାନ୍ତ୍ରିକ ସମସ୍ୟା ଯୋଗୁ ମହାକାଶରେ ଫସି ରହିଛନ୍ତି । ମଙ୍ଗଳବାର ନାସା କହିଛି ଯେ ମାର୍ଚ୍ଚ ମଧ୍ୟଭାଗରେ ସେମାନଙ୍କୁ ଫେରାଇ ଅଣାଯିବ ।

ଉଭୟ ମହାକାଶଚାରୀ ଗତ ୮ ମାସ ଧରି ମହାକାଶ ଷ୍ଟେସନରେ ଫସି ରହିଛନ୍ତି ।ଏହା ପୂର୍ବରୁ ମହାକାଶଚାରୀଙ୍କ ପ୍ରତ୍ୟାବର୍ତ୍ତନ ପାଇଁ ମାର୍ଚ୍ଚ ଶେଷ କିମ୍ବା ଏପ୍ରିଲ୍ ସମୟ ଧାର୍ଯ୍ୟ କରାଯାଇଥିଲା । ସେମାନଙ୍କୁ ଏକ SpaceX କ୍ୟାପସୁଲରେ ଭୂପୃଷ୍ଠକୁ ଫେରାଇ ଅଣାଯିବ ।

ସୁନିତା ୱିଲିୟମ୍ସ ଗତ ବର୍ଷ ଜୁନ୍ ୫ରେ ବୁଚ୍ ୱିଲମୋରଙ୍କ ସହ ଆଇଏସଏସ (ISS)ରେ ପହଞ୍ଚିଥିଲେ । ତାଙ୍କୁ ଏକ ସପ୍ତାହ ପରେ ଫେରିବାର ଥିଲା । ଦୁହେଁ ବୋଇଂର ନୂତନ ଷ୍ଟାରଲାଇନର୍ କ୍ୟାପସୁଲ୍ ଟେଷ୍ଟ ପାଇଁ ଯାଇଥିଲେ । କିନ୍ତୁ ଏଥିରେ ତ୍ରୁଟି ଦେଖାଦେବା ପରେ ସେମାନେ ଆଇଏସଏସରେ ହିଁ ଫସି ଯାଇଥିଲେ । ଏବେ ସେହିଠାରେ ହିଁ ସେମାନେ ଫସି ରହିଛନ୍ତି ।

ପୂର୍ବରୁ ନାସା ଚଳିତ ଫେବୃୟାରୀରେ ସୁନୀତା ଓ ବୁଚ୍ ୱିଲମୋରଙ୍କୁ ଏଲନ୍ ମସ୍କଙ୍କ କମ୍ପାନୀ SpaceXର ଡ୍ରାଗନ୍ ମହାକାଶଯାନ ମାଧ୍ୟମରେ ଫେରାଇ ଆଣିବା ବିଷୟରେ ସୂଚନା ଦେଇଥିଲା । କିନ୍ତୁ ଏହା ହୋଇପାରି ନାହିଁ ।

ନାସା ଅନୁସାରେ, ଏହା ପୂର୍ବ ଘୋଷଣାଠାରୁ କିଛି ସପ୍ତାହ ପୂର୍ବରୁ ସୁନିତା ୱିଲିୟମ୍ସ ଓ ବୁଚ୍ ୱିଲମୋରଙ୍କୁ ଫେରାଇ ଆଣିବ । SpaceX ଆଗାମୀ ମହାକାଶଚାରୀ ଉଡ଼ାଣ ପାଇଁ କ୍ୟାପସୁଲ ପରିବର୍ତ୍ତନ କରିବ, ଯାହା ଦ୍ୱାରା ସୁନିତା ୱିଲିୟମ୍ସ ଓ ବୁଚ୍ ୱିଲମୋରଙ୍କୁ ମାର୍ଚ୍ଚ ମଧ୍ୟଭାଗରେ ପୃଥିବୀକୁ ଫେରାଇ ଅଣାଯିବ । ମିଶନ ପ୍ରସ୍ତୁତି ଏବଂ ଏଜେନ୍ସିର ଉଡ଼ାଣ ପ୍ରସ୍ତୁତି ପ୍ରକ୍ରିୟା ସମ୍ପୂର୍ଣ୍ଣ ହେବା ପରେ ଏଜେନ୍ସିର କ୍ରୁ-୧୦ ଉଦକ୍ଷେପଣକୁ ମାର୍ଚ୍ଚ ୧୨ ତାରିଖକୁ ଲକ୍ଷ୍ୟ ରଖାଯାଇଛି ।

କ୍ରୁ-୧୦ ମିଶନ୍ ନାସାର ମହାକାଶଚାରୀ ଏନି ମ୍ୟାକକ୍ଲେନ୍ ଓ ନିକୋଲ୍ ଆୟର୍ସ, ଜାପାନ ଏରୋସ୍ପେସ୍ ଏକ୍ସପ୍ଲୋରେସନ୍ ଏଜେନ୍ସିର ମହାକାଶଚାରୀ ଟାକୁୟା ଓନିଶି ଏବଂ ରୋସ୍କୋସମସ୍ ମହାକାଶଚାରୀ କିରିଲ୍ ପେସ୍କୋଭଙ୍କୁ ମହାକାଶ ଷ୍ଟେସନକୁ ନେଇଯିବ ।