ଗର୍ଭବତୀ ହେଲେ AI ମନ୍ତ୍ରୀ
ଆଜ୍ଞା ହଁ AI ରୋବୋଟ୍ ହୋଇଛନ୍ତି ଗର୍ଭବତୀ । ଆଉ ପ୍ରସବ ପୂର୍ବରୁ ହିଁ କେତେ ଛୁଆ ଜନ୍ମ କରିବେ ତାହା ମଧ୍ୟ ଜଣା ପଡ଼ିଯାଇଛି । ଏକ କି ଦୁଇ ନୁହେଁ ଏକା ସାଙ୍ଗରେ ୮୩ଟି ପିଲା ଜନ୍ମ କରିବେ ଆଲବାନିଆର ଏହି AI ମନ୍ତ୍ରୀ ।
ତେବେ ଆପଣ ଭାବୁଥିବେ ରୋବୋଟ୍ କେମିତି ଛୁଆ ଜନ୍ମ କରିବ ? ଆପଣଙ୍କ ଚିନ୍ତା ବି ସମ୍ପୂର୍ଣ୍ଣ ରୂପେ ଠିକ୍ ତା’ହେଲେ ଏଭଳି ଚର୍ଚ୍ଚା କାହିଁକି ହେଉଛି ଆସନ୍ତୁ ଜାଣିବା । ଏହି ସୂଚନା ଖୋଦ୍ ଆଲବାନିଆର ପ୍ରଧାନମନ୍ତ୍ରୀ ଏଡି ରାମା ଦେଇଛନ୍ତି । ଜର୍ମାନୀର ବର୍ଲିନରେ ଅନୁଷ୍ଠିତ Global Dialogue Conference ସମୟରେ ଆଲବାନିଆର ପ୍ରଧାନମନ୍ତ୍ରୀ ଏଡି ରାମା ଏହି ଘୋଷଣା କରି ସମସ୍ତଙ୍କୁ ଆଶ୍ଚର୍ଯ୍ୟ କରିଛନ୍ତି ।
ସମ୍ପୂର୍ଣ୍ଣ ବିଷୟ ହେଉଛି ଆଲବାନିଆ ସରକାର ପ୍ରତ୍ୟେକ ସଂସଦ ସଦସ୍ୟଙ୍କ ପାଇଁ ଜଣେ AI ଆସିଷ୍ଟାଣ୍ଟ୍ ସୃଷ୍ଟି କରିବାକୁ ଚିନ୍ତା କରୁଛନ୍ତି । ସେମାନେ ଏହାକୁ AI ମନ୍ତ୍ରୀ ଡିଏଲାଙ୍କ ଗର୍ଭଧାରଣ ଏବଂ ୮୩ ପିଲାଙ୍କ ଜନ୍ମ ସହିତ ଯୋଡ଼ିଛନ୍ତି ।
ବର୍ଲିନ୍ ଗ୍ଲୋବାଲ୍ ଡାଏଲଗରେ ଭାଷଣ ଦେଇ ଆଲବାନିଆ ପ୍ରଧାନମନ୍ତ୍ରୀ କହିଛନ୍ତି, “ଆମେ ଡିଏଲାକୁ ଲଞ୍ଚ୍ କରି ଏକ ବହୁତ ବଡ଼ ରିସ୍କ୍ ନେଇଥିଲୁ ଯେଉଁଥିରେ ଆମେ ସଫଳ ମଧ୍ୟ ହୋଇଥିଲୁ । ଡିଏଲା ବର୍ତ୍ତମାନ ସମୟରେ ଗର୍ଭବତୀ ଅଛନ୍ତି ଏବଂ ୮୩ ଜଣ ପିଲାଙ୍କୁ ଜନ୍ମ ଦେବାକୁ ଯାଉଛନ୍ତି ।
” ପ୍ରଧାନମନ୍ତ୍ରୀଙ୍କ କହିବାନୁସାରେ, “ଏହି ପିଲାମାନେ ଅର୍ଥାତ ଆସିଷ୍ଟାଣ୍ଟମାନେ ସଂସଦରେ ଘଟୁଥିବା ପ୍ରତ୍ୟେକ ଘଟଣା ରେକର୍ଡ କରିବେ ଏବଂ ସାଂସଦମାନଙ୍କୁ ହଜିଯାଇଥିବା ଘଟଣା ଏବଂ ଆଲୋଚନା ବିଷୟରେ ସୂଚନା ଦେବେ ।