ଏୟାରପୋର୍ଟରୁ RCB ମାର୍କେଟିଂ ହେଡ୍ ଗିରଫ
ଆଇପିଏଲ ଟ୍ରଫି ବିଜୟ ଉତ୍ସବ ବେଳେ ବେଙ୍ଗାଲୁରୁ ଚିନ୍ନାସ୍ୱାମୀ ଷ୍ଟାଡିୟମ ବାହାରେ ହୋଇଥିବା ଦଳାଚକଟା ଘଟଣାରେ ବଡ଼ ଆକ୍ସନ ନିଆଯାଇଛି । ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁର ମାର୍କେଟିଂ ହେଡ୍ ନିଖିଲ ସୋସଲେ ଗିରଫ ହୋଇଛନ୍ତି । ମୁମ୍ବାଇ ପଳାଇବାକୁ ଉଦ୍ୟମ କରୁଥିବା ବେଳେ ଏୟାରପୋର୍ଟରୁ ନିଖିଲଙ୍କୁ ଗିରଫ କରିଛି ବେଙ୍ଗାଲୁରୁ ପୁଲିସ । ଅନ୍ୟ ୩ ଜଣଙ୍କୁ ଗିରଫ କରି ପଚରା ଉଚରା କରୁଛି ବେଙ୍ଗାଲୁରୁ ପୁଲିସ । ବୁଧବାର ଚିନ୍ନାସ୍ୱାମୀ ଷ୍ଟାଡିୟମରେ ଆରସିବିର ବିଜୟ ଉତ୍ସବ ପାଳନ ସମୟରେ ବାହାରେ ଦଳଚକଟା ସ୍ଥିତି ହୋଇଥିଲା । ଏଥିରେ ୧୧ ଜଣଙ୍କର ମୃତ୍ୟୁ ହୋଇଥିଲା । ଏହା ପରେ ଆରସିବି ବିରୋଧରେ ମାମଲା ରୁଜ୍ଜୁ ହୋଇଥିଲା ।
ଚିନାସ୍ୱାମୀ ଷ୍ଟାଡିୟମ ବାହାରେ ହୋଇଥିବା ଦଳାଚକଟା ଘଟଣାରେ ପୁଲିସର ଏହା ପ୍ରଥମ ଗିରଫ ଘଟଣା । ମୁମ୍ବାଇ ଯିବା ସମୟରେ ଏୟାରପୋର୍ଟରୁ ଆରସିବିରୁ ମାର୍କେଟିଂ ହେଡ୍ ନିଖିଲ ସୋସଲେଙ୍କୁ ପୁଲିସ ଗିରଫ କରିଛି । ଏହା ସହିତ ଅନ୍ୟ ୩ ଜଣଙ୍କୁ ହେପାଜତକୁ ନେଇଛି ପୁଲିସ । ଇଭେଣ୍ଟ ମ୍ୟାନେଜମେଣ୍ଟ କମ୍ପାନୀର ୩ ଅଧିକାରୀ ଗିରଫ ହୋଇଛନ୍ତି । ଆରସିବି ବିରୋଧରେ ମାମଲା ଦାୟର ହେବା ପରେ ପୁଲିସ ଏହି ବଡ଼ ଆକ୍ସନ ନେଇଛି । ସେମାନଙ୍କୁ ପଚରାଉଚରା କରାଯାଉଛି ।
ଗତ ଜୁନ୍ ୪ ତାରିଖରେ ଆରସିବିର ଆଇପିଏଲ୍ ବିଜୟ ଉତ୍ସବ ବେଳେ ବେଙ୍ଗାଲୁରୁ ଚିନ୍ନାସ୍ୱାମୀ ଷ୍ଟାଡିୟମ ବାହାରେ ଦଳାଚକଟା ଅଘଟଣ ଘଟିଥିଲା । ଏଥିରେ ୧୧ ଜଣଙ୍କର ମୃତ୍ୟୁ ହୋଇଥିଲା । ୩୩ ଜଣ ଆହତ ହୋଇଥିଲେ । ମାମଲାରେ ବେଙ୍ଗାଲୁରୁ ପୁଲିସ ଆରସିବି (ରୟାଲ ଚାଲେଞ୍ଜର୍ସ ବାଙ୍ଗାଲୋର), ଡିଏନ୍ଏ ଇଭେଣ୍ଟ ମ୍ୟାନେଜମେଣ୍ଟ କମ୍ପାନି ଏବଂ କର୍ଣ୍ଣାଟକ କ୍ରିକେଟ ଆସୋସିଏସନ ବିରୋଧରେ ମାମଲା ରୁଜୁ କରିଛି । ବେଙ୍ଗାଲୁରୁ କୁବନ ପାର୍କ ଥାନାରେ ଏମାନଙ୍କ ବିରୋଧରେ ୩ଟି ଏଫଆଇଆର ରୁଜୁ ହୋଇଛି । ଏମାନଙ୍କ ବିରୋଧରେ ଅପରାଧୀକ ଅବହେଳା ଅଭିଯୋଗ ହୋଇଛି ।ଅନ୍ୟପଟେ ଆରସିବି ଦଳାଚକଟାରେ ପ୍ରାଣ ହରାଇଥିବା ପ୍ରତ୍ୟେକ ପ୍ରଶଂସକଙ୍କ ପରିବାରକୁ ୧୦ ଲକ୍ଷ ଟଙ୍କାର ସହାୟତା ଘୋଷଣା କରିଛି । ଏଥିସହ ଆହତ ଲୋକମାନଙ୍କ ଚିକିତ୍ସା ପାଇଁ ଆରସିବି ପକ୍ଷରୁ ଏକ ସମର୍ଥନ ପାଣ୍ଠି (ସପୋର୍ଟ ଫଣ୍ଡ) ଗଠନ କରାଯିବାକୁ ମଧ୍ୟ ଘୋଷଣା କରାଯାଇଛି । ଆରସିବି ଚଳିତବର୍ଷର ଆଇପିଏଲ୍ ଚାମ୍ପିଅନ ହୋଇଥିବାରୁ ଚିନ୍ନାସ୍ୱାମୀ ଷ୍ଟାଡିୟମରେ ବିଜୟ ଉତ୍ସବ କାର୍ଯ୍ୟକ୍ରମର ଆୟୋଜନ କରାଯାଇଥିଲା । କିନ୍ତୁ ତା ପୂର୍ବରୁ ଷ୍ଟାଡିୟମ୍ ବାହାରେ ଦଳାଚକଟା ସ୍ଥିତି ଘଟି ନୀରିହ ଜୀବନ ଚାଲିଯାଇଥିଲା । ସମସ୍ତ ୧୧ ମୃତକଙ୍କ ବୟସ ୩୫ ବର୍ଷରୁ କମ୍ ଥିଲା ବେଳେ ୩ ଜଣ ନାବାଳକ ରହିଥିବା ଜଣାପଡିଛି ।